सुधाकर दुधे
सावली प्रतिनिधी
सावली वनपरिक्षेत्रातर्गत असलेल्या व्याहाड खुर्द उप वनपरिक्षेत्रात सावली पासून १५ किलोमीटर अंतरावर असलेल्या वाघोली बुट्टी येथील प्रेमिका मुकरू रोहनकर वय ५५ वर्ष ही महिला आपल्या शेतात काम करण्यासाठी गेली असता दबा धरून बसलेल्या वाघाने हल्ला करून तिला जागीच ठार केल्याची दुःखद् घटना घडली.
एकच आठवड्यात दुसऱ्यांदा घटना घडल्याने शेतकऱ्यांमध्ये प्रचंड भीतीचे वातावरण पसरले आहे.
सावली वनपरिक्षेत्र अतिशय संवेदनशील क्षेत्र असून या परिसरात वाघ व बिबट यांचा वावर मोठ्या प्रमाणात आहे.
त्यामुळे मागील आठवड्यात वाघोली बुट्टी येथीलच ममता हरिश्चंद्र बोदलकर हीचा वाघाने बळी घेतलेला होता.ही घटना ताजी असतानाच वाघाने पुन्हा एकदा एका त्याच गावातील महिलेचा बळी घेतला.
वाघाने महिलेला ठार केलेल्या घटनेची वन विभागाला माहिती कळताच वनविभाग व पोलिसांचा ताफा घटनास्थळी हजर झाला.
मौका पंचनामा करून सदर महिलेचा मृतदेह सावली ग्रामीण रुग्णालयात तपासणीसाठी पाठविण्यात आला.या घटनेने सावली परिसरात पुन्हा एकदा भीतीचे वातावरण कायम आहे.
