दिनेश कुऱ्हाडे
प्रतिनिधी
आळंदी : संतभुमी असलेली श्री क्षेत्र आळंदी देवाची शहरातील महावितरणाच्या विद्युत खांब आणि चौकातील सार्वजनिक मालमत्तेवर बेकायदा लटकवलेल्या जाहिरातींचे फलक आळंदी नगरपालिकेने गेल्या आठवडाभरात चांगली कारवाई करून हटविले. शहरात हजारांहून अधिक फ्लेक्स हटविल्याने आता चौक आणि विद्युत खांब मोकळे दिसू लागले आहेत.
मात्र, आळंदी शहरातील अनेक बेकायदा आणि मोठाले होर्डिंग आणि त्याचे लोखंडी बांधकाम मात्र कारवाईपासून वंचित असल्याचे चित्र आहे.
पालिकेला शुल्क न भरताच अनेकजण परस्पर शहरात फ्लेक्सद्वारे जाहिराती करत होते. यात राजकीय मंडळी, शैक्षणिक आणि धार्मिक संस्था, औषधांच्या जाहिराती, दुकानांच्या उद्‍घाटनाच्या जाहिराती आणि राजकीय नेत्यांच्या वाढदिवसाच्या जाहिरातीही मोठ्या प्रमाणात शहरात कुठेतरी लटकताना दिसत. या बेकायदा जाहिरातींमुळे शहरात प्रवेश केला की ओंगळवाणे दृश्य दिसू लागले. अनेकदा नागरिकांना तर याचा उबग आल्याचे चित्र होते. वस्तुतः आळंदी नगरपालिकेला या जाहिरातींपासून उत्पन्नही कमी होते. मुळात पूर्वीच्या प्रशासनाने सढळ हाताने ठेकेदाराचा फायदा होईल, अशा पद्धतीने करारनामा करत ठेकेदाराचे उखळ पांढरे केले. मात्र, प्रत्यक्षात आळंदी नगरपालिकेला याचा फायदा नगण्यच होता.
नगरपालिकेला कैलास केंद्रे मुख्याधिकारी म्हणून नव्याने कार्यभार घेतलेल्यांवर जाहिरात फलकांचा नायनाट केला. ठिकठिकाणी लटकलेले फ्लेक्स हटविण्याची कार्यवाही केली. मागील आठवड्यात कारवाईस सुरवात केली आणि शहरातील हजारांहून अधिक फ्लेक्स हटविले. माउलींच्या मंदिरात महाद्वारातील विजेच्या खांबाला लावलेले फ्लेक्सही हटविले. शहरातील विद्युत फलकावर लावलेले बहुतांश फ्लेक्सही हटविले. कारवाईत सातत्य राखले तर आळंदी फ्लेक्समुक्त होण्यात अवधी लागणार नाही.
विद्युत खांबांवर यापुढे फ्लेक्स लावल्याचे आढळून आल्यास फ्लेक्स लावणारे तसेच फ्लेक्सवर नावे असणाऱ्या व्यक्ती अथवा संस्था कायदेशीर कारवाईस पात्र असतील.
– कैलास केंद्रे, मुख्याधिकारी, आळंदी
