वणी : परशुराम पोटे
नगर परिषदेचे मुख्याधिकारी अभिजित वायकोस यांचे आदेशान्वये जत्रा मैदान येथे अतिक्रमण काढण्यासाठी गेलेल्या आरोग्य निरीक्षकाला अतिक्रमण धारकाने शिवीगाळ करत मांस कापण्याचा सुरा घेऊन अंगावर धावून गेला. सदर घटना दि.२२ जुन रोजी सायंकाळी ४ वाजता घडली.
याबाबत आरोग्य निरीक्षक भोलेश्वर ताराचंद यांनी गैरअर्जदार रोशन बाळु लोणारे विरुद्ध वणी पोलिसात शासकीय कामात अडथळा निर्माण केल्याची तक्रार दिली आहे.
नगरपरिषद क्षेत्राअंतर्गत आठवडी बाजार व यात्रा मैदान परिसरात आरक्षित जागेवर केलेले अतिक्रमण हटविण्याचे माजी नगरसेवक पी.के. टोंगे यांनी वारंवार मौखिक व लेखी तक्रार केली होती. तसेच विविध वृत्तपत्रांत बातम्या सुद्धा प्रसिद्ध झाल्या होत्या. या तक्रारीच्या अनुषंगाने नगरपरिषद घनकचरा व्यवस्थापन २०१६ अनव्ये नोटीस तयार करून अतिक्रमणधारकांना देण्यात आले होते.
बुधवार २२ जून रोजी अतिक्रमण हटाव मोहीम अंतर्गत जत्रा मैदान येथिल सिमेंट रस्त्यावर अनधिकृत मांस विक्री करणाऱ्या ठरोशन लोणारे यांना दुकान हटविण्याचे आरोग्य निरीक्षकांनी सांगितले असता रोशन लोणारे यांनी उद्घट भाषेत शिवीगाळ केली. तसेच मांस कापण्याचा सुरा घेऊन आरोग्य निरीक्षक यांच्याकडे मारण्यासाठी धावून गेला. मात्र तिथे उपस्थित कर्मचारी व नागरिकांनी मध्यस्थी करुन वाद मिटवला. आता दि. २७ जून पासून अतिक्रमण हटाव मोहिम राबविण्यात येणार आहे. या मोहीम दरम्यान गैरअर्जदाराकडून जीवितास धोका असल्याचे तक्रारीत नमूद आहे.
या तक्रारीवरून पोलिसांनी कलम 294, 186 व 506 नुसार गुन्हा दाखल केला आहे.