बाळासाहेब सुतार
निरा नरसिंहपुर प्रतिनिधी
पिंपरी बुद्रुक (ता. इंदापूर) येथील पिंपरी बुद्रुक गावचे ग्रामदैवत पिरसाहेब यांचा सालबादप्रमाणे होणारा ऊरूस गुरूवार 20 मार्च ते शनिवार 22 मार्च दरम्यान संपन्न होणार आहे.
पिरसाहेब यात्रा कमिटी, ग्रामपंचायत व ग्रामस्थ यांनी पिरसाहेब यांच्या ऊरूसाची जय्यत तयारी केलेली आहे.
पुणे, सोलापूर, सांगली, सातारा या सर्व जिल्ह्याच्या भागातून हजारोच्या संख्येने भाविक भक्त दर्शन व आशीर्वाद घेण्यासाठी आपली उपस्थित लावीत असतात.
यात्रा कमिटी व पिंपरी बुद्रुक पंचक्रोशीतील सर्व ग्रामस्थांनी आलेल्या भाविकांसाठी सर्व काही सुख सोयी, गावची स्वच्छता, पिण्यासाठी स्वच्छ पाणी, संपूर्ण गावामध्ये इलेक्ट्रिक बल्ब बसवून लाईटची सोय, कुस्ती मैदानासाठी आखाडा, यात्रेनिमित्त मिठाई दुकानदारांच्या सोई, यात्रेकरूंना व भाविकांना कोणतीही अडचण येणार नाही असे यात्रा कमिटीच्या वतीने सांगण्यात आले आहे.
पिंपरी बुद्रुक पंचक्रोषीतील भाविकांचे ग्रामदैवत पिरसाहेब यांचा सालाबादप्रमाणे संदल गुरूवार 20 मार्च रोजी सायंकाळी 9 वाजता मजारवर चादर चढवण्यात येणार आहे. तर शुक्रवार 21 मार्च रोजी मुख्य उरुस भरणार असून पुणे, सोलापूर,सातारा सांगली, जिल्ह्यातील भाविकांबरोबर पंचक्रोशीतील भाविक नवस फेडण्यासाठी व दर्शनास मोठी गर्दी करीत असतात.
त्याच दिवशी मेवा मिठाई, खेळणी, बांगडी, सौदर्य प्रसाधने, आईस्क्रीम, ज्युस आदि विक्रीच्या मोठ्या दुकानांची गर्दी होत असते. पिरसाहेब मंदिरातील देवाच्या मानाच्या घोड्यांची मिरवणूक ( छबीना) सायंकाळी 7 वाजता फटाक्यांच्या आतषबाजीत लेझीम, हलगींच्या निनादात काढण्यात येणार आहे. रात्री 9 वाजता निलेशकुमार आहिरेकर सह रूपाली पुणेकर लोकनाट्य तमाशा मंडळ काळज (नारायणगाव) यांचा प्रसिध्द तमाशा होणार आहे.
शनिवार 22 मार्च रोजी सायंकाळी 4 वाजता पुणे व सोलापूर जिल्ह्यातील नामांकित मल्लांच्या उपस्थितीत कुस्त्यांचा जंगी आकाडा संपन्न होणार आहे. त्यानंतर सायंकाळी पीरसाहेब मंदिराला प्रदक्षिणा व प्रार्थना करुन ऊरुसाची सांगता करण्यात येणार आहे.
