रामदास ठुसे
नागपूर विभागीय प्रतिनिधी
चिमूर तालुक्यातील वाघेडा गावातील एका कुटुंबाला भामट्या फकिराने भविष्यवाणी सांगून कुटुंब उद्ध्वस्त होईल, अशी भीती दाखवून पूजाअर्चा करण्याच्या नावाखाली ७ लाख ९१ हजार ६०० रुपये लुटले.
याप्रकरणी पीडित कुटुंबीयांनी चिमूर पोलिसांत तक्रार केली होती. या तक्रारीच्या अनुषंगाने एक वर्षानंतर १८ फेब्रुवारीला चंद्रपूर येथून चार भोंदू फकिरांना अटक करण्यात चिमूर पोलिसांना यश आले.
मागील वर्षी जानेवारी २०२४ मध्ये चिमूर तालुक्यात ४ ते ५ भोंदू फकीर भविष्यवाणी सांगण्याचे आमिष दाखवून फिरत होते. भविष्य सांगून अनेक कुटुंबीयांची पूजाअर्चा करण्याच्या नावाखाली पैशाची लूटमार केली. अशातच ते वाघेडा येथील ज्योत्स्ना अनिल मेश्राम या महिलेच्या घरी गेले.
फकिरांनी भविष्य सांगताना कुटुंबीयांवर संकट आले आहे. तुझे कुटुंब उद्ध्वस्त होणार आहे. यात मुलगा व मुलीचे निधन होईल, असे खोटे सांगून भामट्यांनी सदर महिलेला पूजापाठ करण्याच्या नावाखाली ७ लाख ९१ हजार ६०० रुपयांनी गंडविले व पसार झाले.
भामटे पूजेसाठी आले नसल्याने आपली फसगत झाल्याचे लक्षात येताच महिलेने पोलिसांत तक्रार दाखल केली. पोलिसांनी तत्काळ तपासाची चक्रे फिरविली. मात्र, आरोपी तब्बल एक वर्षानंतर नागभीड येथील गुन्ह्याचा तपास करीत असताना पोलिसांच्या जाळ्यात अडकले.
चार आरोपींना चंद्रपूर येथून अटक करून नागभीड पोलीस गुन्ह्याचा तपास करीत असताना पोलिसांनी खाक्या दाखविताच चार आरोपींपैकी एकाने वाघेडा येथील लूटमार प्रकरणाचा गुन्हा कबूल केला आणि इतर आरोपींची नावे सांगितल्याची माहिती पुढे आली आहे. इतर आरोपींना लवकरच अटक करण्यात येईल, अशी माहिती पोलिसांनी दिली.
ही कारवाई चिमूरचे पोलीस निरीक्षक संतोष बाकल यांच्या मार्गदर्शनाखाली साहाय्यक पोलीस निरीक्षक मल्हारी ताळीकोटे यांच्या नेतृत्वात करण्यात आली. तब्बल एका वर्षानंतर आरोपींना जेरबंद करण्यात आल्याने पीडित महिलेला न्याय मिळण्याची अपेक्षा व्यक्त केली जात आहे.
