दिनेश कुऱ्हाडे
उपसंपादक
पुणे : राज्यात कर्करुग्णांची संख्या मोठ्या प्रमाणात वाढत आहे. अनेक रुग्णांना महागडे उपचार परवडत नाहीत. या पार्श्वभूमीवर रुग्ण व त्यांच्या नातेवाइकांना आधार देण्यासाठी रुग्ण हक्क परिषदेच्या वतीने कर्करोगमुक्त महाराष्ट्र अभियान हाती घेण्यात आले असून, या अभियानांतर्गत कॅन्सरवरील महागडे उपचार मोफत करण्यात येणार आहेत.
कर्करोगमुक्त महाराष्ट्र अभियानाचे प्रमुख तथा रुग्ण हक्क परिषदेचे संस्थापक अध्यक्ष उमेश चव्हाण यांनी पत्रकार परिषदेत मंगळवारी ही माहिती दिली. यावेळी युनिव्हर्सल हॉस्पिटलच्या मुख्य कार्यकारी अधिकारी डॉ. स्मिता भोयर, होप हॉस्पिटल अँड कॅन्सर सेंटरचे मुख्य संचालक डॉ. अमोल देवळेकर, कर्करोग विभागप्रमुख डॉ. अमोघसिद्धी भांडारकर, रुग्ण हक्क परिषदेचे केंद्रीय सल्लागार माजी सहायक पोलीस आयुक्त मिलिंद गायकवाड, परिषदेच्या पुणे शहराध्यक्ष अपर्णा मारणे साठे, अमोल हुलावळे आदी उपस्थित होते.
उमेश चव्हाण म्हणाले की, सध्या पुण्यात लाखो रुग्ण कर्करोगावरील उपचार घेत आहेत. हे उपचार घेताना रुग्णांना आर्थिक तडजोड करतानाच कर्जबाजारी व्हावे लागते. ही गोष्ट लक्षात घेऊन हे अभियान हाती घेण्यात आले आहे. कर्करोगासाठीची केमोथेरपी, इमिनोथेरपी, शस्त्रक्रिया, रेडिएशन, आवश्यक औषधे व इंजेक्शन यांच्या किमती लाखो रुपयांच्या घरात आहेत. सर्वसामान्य माणसाला हे उपचार परवडणारे नाहीत. त्यामुळे या अभियानाच्या माध्यमातून कर्करोगावरील केमोथेरपी आणि शस्त्रक्रिया शासकीय योजनांच्या माध्यमातून पूर्णपणे मोफत करण्यात येणार आहेत.
उपचारांसाठी संपर्काचे आवाहन
पुण्यातील शनिवारवाड्यानजीक असलेल्या युनिव्हर्सल हॉस्पिटल आणि नाना पेठेतील होप हॉस्पिटल अँड कॅन्सर सेंटर येथे कर्करोगावर मोफत उपचार सुविधा उपलब्ध असणार आहे. अधिक माहितीसाठी रुग्णांनी व नातेवाइकांनी ९८५०००२२०७ या क्रमांकावर संपर्क साधावा, असे आवाहन करण्यात आले आहे.
