राज्य नाट्य स्पर्धेच्या चंद्रपूर केंद्राचा निकाल अखेर जाहीर…  — मराठी बाणा संस्थेचे वृंदावन नाटक सात पुरस्कारांसह ठरले अव्वल….

प्रेम गावंडे

उपसंपादक

दखल न्युज भारत

          राज्य शासनाच्या सांस्कृतिक कार्य संचालनालयाच्या वतीने घेण्यात येणाऱ्या 61 व्या राज्यस्तरीय मराठी हौशी नाट्य स्पर्धेच्या प्राथमिक फेरीत चंद्रपूर केंद्रावरून मराठी बाणा संस्थेचे वृंदावन हे नाटक अव्वल ठरले आहे. स्पर्धा संपूनही सव्वा महिना लोटल्यानंतर देखील या केंद्राचा निकाल जाहीर झाला नव्हता. स्पर्धेतील दोन नाटकांमध्ये हिंदू विरोधी आशय असल्याने त्यावर काही संघटनांनी आक्षेप घेतला होता. मात्र हे आक्षेप दूर सारत सांस्कृतिक कार्य विभागाने अखेर हे निकाल जाहीर केले.

         विधवांच्या प्रश्नावर मर्मस्पर्शी लिखाण असलेले इरफान मुजावर लिखित वृंदावन हे नाटक बकुळ अजय धवने यांनी दिग्दर्शित केले होते. या नाटकाला निर्मितीच्या प्रथम पुरस्कारासह दिग्दर्शन, प्रकाशयोजना, रंगभूषा व अभिनयाची 3 गुणवत्ता प्रमाणपत्रे देखील मिळाली आहेत. वृंदावन नाटकाच्या चमूवर नाट्य क्षेत्रातून अभिनंदनाचा वर्षाव होत आहे.